Hå kommune ligg i Rogaland fylke og er ein del av Jærregionen. Hå kommune blei oppretta i 1964 ved samanslåing av dei tidlegare kommunane Nærbø, Varhaug og Ogna. Tettstadene i kommunen er vakse fram rundt stasjonane langs Jærbanen, som blei bygd på 1870-talet. Betra kommunikasjon la grunnlaget for framveksten av det moderne Jærjordbruket. Hå kommune er idag eit av dei viktigaste jordbruksområda i landet, ca 50 % av arbeidsplassene i kommunen er tilknytta jordbruket.
Det meste av den nær 4 mil lange kysten er rett, utan skjærgard eller innskjeringar. I nordvest renn Hå-elva gjennom det flate landskapet. Nord for elveosen ligg sanddyner med marehalm, sør for elva ligg morenebakkar. Havet utanfor dei lange strendene er etter måten langgrunt. Utanfor morenene er havet djupare. Sør for Obrestad fyr, som ligg oppe på morenebakken, har ein derfor kunna laga ei kunstig hamn. Sørover frå Obrestad er det rullesteinstrender som i bukta nord for Ogna går over til fin sandstrand. Vidare mot sør byrjar kysten å bli meir innskoren og terrenget stig brattare opp frå sjøen. Her er det naturlege hamner i Sirevåg og Holmane